Teško je povjerovati da postoje ljudi koji ustaju raspoloženi i veseli jer većina ujutru ima jako nizak prag tolerancije za sve oko sebe. Ipak, ranoranioci nisu mit, zapravo i vi možete postati jedan od njih, samo ako budete slijedili ovih nekoliko jednostavnih koraka koji će vas pretvoriti u super raspoloženu jutarnju osobu.
1. Navijte samo jedan alarm
Buđenje uz iritantan zvuk alarma već je samo po sebi dovoljno loše, a još gore je kada taj isti zvuk ujutru čujete 18 puta zaredom. Tu patnju možete riješiti tako što ćete naviti samo jedan alarm i čvrsto odlučiti da ćete tada ustati, bez odgađanja. Jutro će odmah biti manje stresno, a vi ćete biti raspoloženi bolje nego da ste odspavali još 20-ak minuta i sve to vrijeme gasili alarme.
2. Alarm navijte 15 minuta ranije nego inače
Najsigurniji način da upropastite svoje jutro, pa i ostatak dana je da ustanete u zadnji čas i mahnito jurite po kući kako biste se spremili za posao. Navijte sat 15 minuta ranije nego što inače ustajete, dobićete puno više nego što ćete izgubiti. Nema ničeg boljeg od laganog jutra, kada stignete da se opustite uz šoljicu omiljenog napitka i doručak i pomno razmislite o svojoj odjevnoj kombinaciji za taj dan.
3. Nemojte gubiti vrijeme na društvene mreže
Nema lakšeg načina za traćenje vremena od listanja Instagrama čim otvorite oči. Pola sata prođe za tren, a vi niste napravili ništa pametno ni dobro za sebe, nego ste od ranog jutra gledali samo u telefon. Izbacite to iz navike i provedite jutro bez telefona i imaćete puno više vremena za važnije stvari.
4. Doručkujte za stolom
Ako ste jedna od onih osoba koje vole da rade više stvari odjednom, kada je riječ o doručku zaboravite na tu naviku. Ne kaže se uzalud da je to najvažniji obrok u danu, a biće još bolji ako mu se posvetite u potpunosti i pojedete ga za stolom.
5. Pripremite outfit za naredni dan, pred spavanje
Pripremite li svoj outfit večer unaprijed, imaćete puno više vremena za opuštajuće jutarnje rituale, a vjerovatno će biti i puno bolji od onog koji biste smislili ujutru, na brzinu.
6. Vježbajte
Možda će vam ovo zvučati suludo, ali navijte sat još malo ranije, kako biste stigli odraditi jutarnji trening, vaš dan će biti bolji nego ikad. Ne treba to da bude neki pretjerano naporan trening, dovoljno će biti barem deset minuta joge ili nekoliko serija čučnjeva, trbušnjaka i sklekova, a svaka vježba će uticati na lučenje endorfina, odnosno hormona sreće.
7. Uvedite neki beauty ritual
Možda će to za neke biti samo tuširanje, dok će drugi ujutru prirediti pravi spa tretman. Kako god bilo, dobro je imati neku jutarnju uljepšavajuću rutinu zbog koje ćete se osjećati ljepše i svježije, jer ćete tako dan započeti u odličnom raspoloženju.
8. Lezite na vrijeme
Naravno, važno je i da ste naspavani, a s obzirom na to da smo vas već natjerali da ustanete ranije nego obično, onda bi trebalo razmišljati i o vremenu kada odlazite na spavanje, kako biste se ipak probudili odmorni i svježi.
(Izvor: ljepotaizdravlje.ba)
